Töcc i agn,

quando s’ère bòcia,

la me mama, santa dòna,

la me spedia

finit la scöla

dai me noni contadì

en "Val del Fich"

frasiù de Ciüdü,

cömü dela Basa

en Val Caalina.

Adès i la ciama

"vacanza intelligente,

agriturismo scolastico"

ma per la me mama

el vülia dì

liberas per ü per de mis

d’öna teribile peste

compàgn de me.

Sveglia al canto del gal,

öna scödèla de polenta e

lacc

po’ via de corsa, a pe nüt,

a guarnà i ache,

porta vià ol rüt

e mpienì la trais de fe.

Dopo, söl car tiràt di bö,

ndì càp a taià ol melgòt,

sfoial, po’ tacàl sö

ai traf del legn del

portech

a fal secà.

Gh’è de daga ol solfer

ai filar dela ìt,

- L’öa l’è maruda ! -

el sentenzia ü bel de

ol me nono Giòp.

- L’è ura de vendemià –

L’era öna gran festa !

I riaa i scete de montagna

che i cantaa contete

intàt ch’i lauràa,

e la sira, sö l’era,

dopo la pèsta di grate,

i balàa alegre

coi zuegn dela contrada.

segue in alto a destra >>

>>

Piö tarde, stöf ’ndacc,

al ciar dela löm

sprofondae in del paiù.

Dò gratade dè pölès

e me se ndormentae dè colp

i me cari genitur

e töcc i me amis de scöla.

S’ere en vacansa,

ma per me la fadiga,

a cà di me noni,

l’era pròpe tròp tanta.

I momènc piö bei

de töta sta storia ?

L’era quando fae scapà

cunì e galine,

pisae zo dala lobbia,

ghè scundie la pipa al nono

o saltae sö

la pianta de fich

con d’öna fèta

de polenta frègia,

a sircà fò i piö gròss

per fa la colasiù.

La me nona Batistina,

anche le santa dòna,

sota la pianta de fich

semper piö spaentada,

- Mario, sta atent

de mia borlà zo.

E mangia ch’i piö marücc

ch’i è piö bù

perché quei amò zerb

i te farà ciapà

la grataröla o schitù !-.